ඇන්ඩ්‍රියාගේ නිවසේ ජීවිතය අස්ථාවර වූ අතර ඇය වයස අවුරුදු දහහතරක් වූ විට නිවසින් පිටවී, රැකියාවක් සොයාගෙන මිතුරන් සමඟ ජීවත් වූවාය. ආදරය සහ සහතිකය සඳහා ආශාවෙන් සිටි ඇය, පසුව මත්ද්‍රව්‍ය ඇයට හඳුන්වා දුන් පුද්ගලයෙකු සමඟ පදිංචියට ගියාය. ඇය ඒ වන විටත් නිතිපතා මත්පැන් පානය කරමින් සිටි අතර ඊට අමතරව එයට මත් ද්‍රව්‍යද එකතු කරන ලදී. නමුත් සම්බන්ධතාවය සහ මත් ද්‍රව්‍ය ඇගේ ආශාවන් තෘප්තිමත් කළේ නැත. ඇය දිගටම එය සොයමින් සිටියාය. වසර කිහිපයකට පසු, ඇයට යේසුස්වහන්සේ තුළ ඇදහිලිවන්තයන් කිහිප දෙනෙකු මුණගැසුණු අතර ඔවුන් ඇය සමඟ යාච්ඤා කිරීමට ඉදිරිපත් විය. මාස කිහිපයකට පසු, අවසානයේදී ඇයට ආදරය සඳහා වූ ඇගේ පිපාසය සංසිඳුවිය හැකි තැනැත්තා වන යේසුස්වහන්සේව සොයා ගත හැකි වුනි.
බීමට පැන් ටිකක් ඉල්ලා ළිඳ ළඟට ගිය යේසුස්වහන්සේට මුණගැසුණු සමාරිය ස්ත්‍රියටත් ඇගේ පිපාසය සන්සිඳවා ගත හැකි වුනි. ඇය දහවල් කාලයේ එහි සිටියේ (යොහන් 4:5-7), බොහෝ විට, ඇයගේ ස්වාමිපුරුෂයන් කිහිප දෙනෙකුගේ ඉතිහාසය සහ ඇගේ වර්තමාන කාමමිථ්‍යාචාර සම්බන්ධය දැන සිටිය හැකි වෙනත් කාන්තාවන්ගේ බැල්ම සහ ඕපාදූප වළක්වා ගැනීමට විය හැකිය (17-18 පද). සාමාන්‍යයෙන් සමාරිය කාන්තාවක් සමඟ ඇසුරු නොකළ යුදෙව් ගුරුවරයෙකු ලෙස යේසුස්වහන්සේ ඇය වෙතට පැමිණ ඇයගෙන් ජලය ඉල්ලා සිටි විට, උන්වහන්සේ ඒ දවසේ සමාජ සම්මුතීන්ට පිටුපෑසේක. නමුත් උන්වහන්සේට අවශ්‍ය වූයේ ඇයව සදාකාල ජීවනයට මග පෙන්වන ජීවන ජලය නමැති තෑග්ග ඇයට ලබා දීමටය (10 පදය). උන්වහන්සේට අවශ්‍ය වූයේ ඇගේ පිපාසය සන්සිදුවීමටය.
අප, යේසුස්වහන්සේ අපගේ ගැළවුම්කරුවාණන් ලෙස පිළිගන්නා විට, අපිත් මෙම ජීවමාන ජලය පානය කරන්නෙමු. අන් අයට යේසුසමිඳුන්ව අනුගමනය කිරීම සඳහා ආරාධනා කරන විටදී අපට ඔවුන් සමඟ අප ලැබූ ජීවන ජලයෙන් කෝප්පයක් බෙදා ගත හැකිය.
