බේස්බෝල් ක්‍රීඩාවේ, 1906 ලෝක ශූරතා තරඟාවලියට පෙර, ක්‍රීඩා රචක හියු ෆුලර්ටන් විසින් නිවැරදිව අනාවැකියක් කළේය. ඒ ජයග්‍රහණය කිරීමට බලාපොරොත්තු වූ චිකාගෝ කබ්ස් කණ්ඩායම පළමු සහ තෙවැනි තරඟවලින් පරාජයට පත්වන බවත් දෙවැනි තරඟය ජයගන්නා බවත් ඔහු පැවසීය. එසේම අහෝ, හතර වන තරඟාවලියේදී වරුසාවක් ඇතිවන බවත් ඔහු තව දුරටත් අනාවැකි කීවේය. ඔහු සෑම කරුණකදීම නිවැරදි විය. ඉන්පසුව, 1919 දී, ඔහුගේ විශ්ලේෂණ කුසලතා ඔහුට පැවසුවේ ඇතැම් ක්‍රීඩකයින් හිතාමතාම ලෝක තරඟාවලියේ තරඟ පරදින බවයි. ෆුලර්ටන් සැක කළේ ඔවුන්ට සූදුකරුවන් විසින් අල්ලස් ලබා දී ඇති බවයි. ජනප්‍රිය මතය ඔහුව සමච්චලයට ලක් කළේය. නැවතත්, ඔහු නිවැරදි විය.
ෆුලර්ටන් අනාගතවක්තෘවරයෙකු නොවීය. ඔහු සාක්ෂි අධ්‍යයනය කළ ප්‍රඥාවන්ත මිනිසෙකු පමණක් විය. යෙරෙමියා සැබෑ අනාගතවක්තෘවරයෙක් වූ අතර ඔහුගේ අනාවැකි සෑම විටම සැබෑ විය. ගව වියගහක් පැළඳ සිටී යෙරෙමියා, යුදයාවට පැවසුවේ බැබිලෝනිවරුන්ට යටත් වී ජීවත් වන ලෙසය (යෙරමියා 27:2, 12). බොරු අනාගතවක්තෘ හනනියා ඔහුට විරුද්ධ වී වියගහ කඩා දැමීය (28:2-4, 10). යෙරෙමියා ඔහුට කථා කොට මෙසේ කීවේය. “හනනියා, අසාපන්න; ස්වාමින්වහන්සේ නුඹ නොඑවූ සේක;” තව දුරටත් යෙරෙමියා කතා කොට, “නුඹ මේ අවුරුද්දේ මැරෙන්නෙහි” යයි කීවේය (15-16 පද). මාස දෙකකට පසු, හනනියා මිය ගියේය (17 පදය).
අලුත් ගිවිසුම අපට පවසන්නේ “දෙවියන්වහන්සේ ආදි කාලයෙහි. . . ප්‍රොපේතවරුන් ලවා පියවරුන්ට කතා කරවා, .. .මේ දවස්වල කෙළවරදී තමන්වහන්සේගේ පුත්‍රයාණන් ලවා අපට කථා කෙරෙවු සේක” (හෙබ්‍රෙව් 1:1-2) යනුවෙනි. යේසුස්වහන්සේගේ ජීවිතය, මරණය සහ උත්ථානය තුළින් සහ ශුද්ධ ලියවිල්ල හා ශුද්ධාත්මයාණන්ගේ මඟ පෙන්වීම තුළින් දෙවියන්වහන්සේගේ සත්‍යය අදටත් අපට උපදෙස් දෙයි.
